Fuq tal-linja: Lis-signs ma jagħtux kashom

Lis-signs ma jagħtux kashom
In-nies bilwieqfa fuq l-istages li minnhom jgħaddu l-karozzi fid-direzzjoni għall-Belt, ġeneralment tassumi li kull karozza li tgħaddi tkun fil-fatt sejra l-Belt. Ftit huma dawk li jafu li hemm bosta rotot ġodda b’numri eżotiċi bħal 627, 645, 652, 667 jew 675 li jiksru ’l dir-regola.

Għalhekk, għalkemm is-667 tmur l-Università, ix-xufier xorta waħda jiġi ssinjalat biex iwaqqaf min-nies wieqfa fuq l-istages, stage wara l-ieħor. Kull darba li jwaqqaf, qabel ma jitilgħu javżahom: Din mhix għall-Belt… għall-u’versità. Normalment il-passiġġier iwieġeb lura b’xi Oooo… ta’ diżappunt, u x-xufier isuq ’l hemm u jidgħi xi tnejn b’wiċċ il-Madonna.

Darba, wara avveniment minn dawn, lix-xufier għedtlu Għax ma twaħħalx karta kbira li tkun tidher minn barra u li tgħid: DIN GĦALL-UNIVERSITÀ, MHUX GĦALL-BELT? Fil-pront weġibni Għax lis-signs ma jagħtux kashom….

Għedtlu Kif ma jagħtux kashom? Jekk tkun trid tmur il-Belt, u s-sign tgħidlek li mhix għall-Belt, ma tagħtix kasha?

Qalli Ħa ngħidlek sieħbi, għax int ’qq Alla ma tafx… darba waħħalt NO FOOD NO DRINK u xorta baqgħu jieklu w jixorbu… ma tawx kas dik se jagħtu kas din?
- ix-xufier
- jien
- № 667
- signs
- stage
Miktub u ppubblikat minn dwardu Thursday, November 15, 2007.

Tħallew 5 kummenti.

Liċenzja

Tista’ tikkwota r-rakkonti f’dis-serje “Fuq tal-linja” kemm trid, basta tagħti l-mertu ’l min qagħad jiktibhom, jiġifieri lili, Edward Grech, u li ma taqlax flus fil-proċess. Jekk tiġi f’xi dubju, iktibli. Grazzi.

Ir-ritratti li ġieli nuża f’dal-blogg biex nillustra l-istejjer huma riprodotti bil-kunsens ta’ min ġibidhom, u huma lliċenzjati lilhom.

Id-diżinn grafiku ta’ dal-blogg ibbażajtu fuq tqasqis minn sett ta’ ritratti miġbudin minn ċertu Eirik Newth, li ġentilment għoġbu jaqsamhom ma’ kulħadd permezz ta’ liċenzja Creative Commons.